هل سيدنا آدم هو أبو الخلق وقبل خلقة كان يوجد بشر علي كوكب الأرض

هل سيدنا آدم( علية السلام ) هو ابو البشر

واحنا صغيرين واحنا عارفين قصه خلق ربنا لسيدنا ادم من الطين ونفخ فيه الروح .. وكنا بنشوف تطور الانسان من القرد مش صح عشان احنا اتعلمنا فى دينا من واحنا صغيرين ان ربنا اللى خلق اول انسان وهو "ادم

وعرفنا ان الانسان حياته بدأت على الارض فى حدود 40 الف سنه ودى الفتره اللى جه فيها الانبياء ..

لحد ما تم اكتشاف جماجم مختلفه لاكتر من شبيه بالانسان عمرها حوالى 5 مليون سنه

هنا بدأت المشكله .. وجود اشباه للانسان الحالى فى عصر اقدم بكتير من عصرنا الحالى بيدعم جدا نظريه التطور .. وبما ان ((نظريه التطور: بتقوم على ان كل الاحياء ليها سلف مشترك )) .. فالنتيجه لكده ان الانسان العاقل هو نتيجه لسلسه من التطورات حصلت لأسلافنا وصلتنا لشكل الانسان الحالى!!

طيب واللى احنا عارفينه عن ان ربنا خلق سيدنا ادم من الطين وان ادم هو اول انسان !!!
والتطور فى الكائنات بقى شبه حقيقه علميه
ازاى قصه خلق ادم فى الدين ... وهل العلم بيخالف الدين فعلا 

لو بصينا لقصه خلق ادم باختصار من المنظور الدينى
هى ان ربنا بعد خلق الكون ..خلق من طين الارض جسم سيدنا ادم فكان زى تمثال من الصلصال .. وقال للملائكه انه هيخلى الانسان ده خليفه فى الارض..

"وَإِذْ قَالَ رَبُّكَ لِلْمَلائِكَةِ إِنِّي جَاعِلٌ فِي الأَرْضِ خَلِيفَةً " (البقرة:30)
وبعد فتره ربنا نفخ فى سيدنا ادم الروح .. فتحول التمثال لانسان ..وبعدها ربنا نزل سيدنا ادم للارض

ولو بصينا لقصه ظهور الانسان باختصار وفقا لنظرية التطور
هى ان نتيجه التطور فى الكائنات الحيه ظهر من حوالى 7 مليون سنه السلف المشترك للقرده العليا واشباه الانسان ..تطور منه اشباه الانسان اللى عاشوا ملايين السنين وظهر منهم انواع كتير وهى عباره عن كائنات شبه الانسان بس ظهرها محنى شويه ومخها صغير وبدأت تستخدم رجليها فى المشى من حوالى 4 مليون سنه وفضل يتطور لحد ما حجم مخه زاد وظهر الانسان العاقل اللى هو احنا دلوقتى من حوالى 60 الف سنه تقريبا

وللاسف كان الحل الوحيد اللى كان قدام علماء المسلمين انهم ينكروا نظريه التطور نفسها على الرغم من صحتها لانهم مش لاقيين حل لمعضله اذا كان الانسان تطور فعلا !! يبقى كيف خلق الله آدم ؟؟؟
وظهر السؤال "هل آدم هو ابو البشر" ؟؟
هنوصل للحقيقه باعاده ترتيب احداث قصه الخلق من جديد

بدأت قصه خلق الانسان لما ربنا خلق السماوات والارض وخلق الحياه على الارض ... والكائنات البسيطه فضلت تتطور على مدار مليارات السنين لكائنات اكتر تعقيدا
لحد ما ظهرت كل انواع الكائنات الحيه المعروفه .... وكان فى اخر سلسله التطور اشباه البشر اللى يعتبروا اكتر حيوانات متطورة على وجه كوكب الارض وقتها .. (يرجى الاطلاع على نظرية التطور)

ولما ربنا قضى امر انه يخلق البشر قرر انه يخلقه على هيئه اكثر الكائنات تطورا على وجه الارض اللى هما "اشباه الانسان" وربنا قرر انه يصطفى من الانواع الموجوده وقتها صنف يخلق سيدنا ادم على هيئته والدليل على كده من القرآن.

إِنَّ اللَّهَ اصْطَفَى آدَمَ وَنُوحًا وَآلَ إِبْرَاهِيمَ وَآلَ عِمْرَانَ عَلَى الْعَالَمِين - آل عمران:33

وكانت فكره اصطفاء ربنا لسيدنا ادم فكره مش واضحه لينا زمان لان ربنا هيصطفيه من بين مين لو هو اول انسان... لكن الاصطفاء هنا معناه الاصطفاء من بين اشباه البشر.

وبما ان سيدنا ادم سبقه اشباه الانسان فى العيش على الارض ربنا سماه بالخليفه لانه هيخلف ناس سبقته وعاشت على وجه الارض

"وَإِذْ قَالَ رَبُّكَ لِلْمَلائِكَةِ إِنِّي جَاعِلٌ فِي الأَرْضِ خَلِيفَةً قَالُواْ أَتَجْعَلُ فِيهَا مَن يُفْسِدُ فِيهَا
وَيَسْفِكُ الدِّمَاء وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لاَ تَعْلَمُونَ " - البقرة:30

وبما ان الملايكه ميعرفوش الغيب ... فهما مكنوش يعرفوا ان الانسان هيسفك الدم ويفسد فى الارض فى المستقبل ...
لكنهم قالوا كده لانهم شافوا حياه اشباه البشر قبل كده على الارض وشافوا انها كائنات همجيه
ومكنوش يعرفوا ان سيدنا ادم هيكون عاقل غير همجى وكان رد ربنا " قَالَ إِنِّي أَعْلَمُ مَا لاَ تَعْلَمُونَ"

ونكتشف فى سورة السجده 3 ايات مبهره بتكشف قضيه خلق الانسان بشكل جديد

الَّذِي أَحْسَنَ كُلَّ شَيْءٍ خَلَقَهُ وَبَدَأَ خَلْقَ الإِنسَانِ مِن طِين
ثُمَّ جَعَلَ نَسْلَهُ مِن سُلالَةٍ مِّن مَّاء مَّهِينٍ
ثُمَّ سَوَّاهُ وَنَفَخَ فِيهِ مِن رُّوحِهِ وَجَعَلَ لَكُمُ السَّمْعَ وَالأَبْصَارَ وَالأَفْئِدَةَ قَلِيلا مَّا تَشْكُرُونَ - السجدة:7-9

الايات دى بتعرفنا ان ربنا بدأ خلق الانسان من طين فعلا او انه بدأ الحياه على سطح الارض..
بعد كده خلاه يتكاثر عن طريق التزواج .... وبعد كده سواه ونفخ فيه الروح ..

ولو طبقنا ترتيب الايات نقدر نكتشف ان ربنا بدأ خلق الانسان عن طريق التطور للوصول لاشباه الانسان
وفضل يتطور ويتكاثر عن طريق التزواج بين الاناث والذكور لحد ما جت لحظه الاصطفاء
وربنا خلق سيدنا ادم بعد ما اصطفاه
وبعدها سواه ونفخ فيه الروح !!! طيب ايه هى التسويه !!!

يَا أَيُّهَا الإِنسَانُ مَا غَرَّكَ بِرَبِّكَ الْكَرِيم
الَّذِي خَلَقَكَ فَسَوَّاكَ فَعَدَلَكَ - الانفطار:6-7

فى الايه دى التسويه بترتبط بالخلق..فالانسان اتخلق اولا وبعدها ربنا سواه وعدله
...وده بيوضح الصورة بشكل كبير اخيرا !!

ربنا اصطفى من اشباه البشر اللى كانوا موجودين اكثر واحسن المخلوقات دى
وخلق سيدنا ادم من الطين على شكل احسن شبيه للانسان
بعد كده ربنا سواه بانه عدل ظهره وخلاه مستقيم فى مشيته
وعدله وحسن اعضائه وعموده الفقرى وحجم مخه بقى اكبر عشان يبقى قادر على الادراك ..
وبعد ما ربنا خلق سيدنا ادم وسواه وعدله
واصبح افضل من كل اشباه الانسان على وجه الارض ..
نفخ فيه الروح .. فتحول لانسان "عاقل" من لحظه نفخ الروح
وظهر اول انسان عاقل مدرك عرفته الارض وهو سيدنا ادم
وكان مخه تطور بشكل كبير جدا عن كل المخلوقت التانيه

نظريه التطور صحيحه ... وقصه خلق ربنا لسيدنا ادم من الطين صحيحه
لكن فهم مفاهيم الاصطفاء وجعل الخليفه والتسويه والاعتدال ونفخ الروح وظهور الانسان العاقل هى الحلقه اللى كانت ناقصه للربط بين العلم والدين

والسؤال هنا هل نظريه داروين صحيحه؟؟"
بالفعل خاطئه بنسبه ١٠٠℅ وان الاجابه الصحيحه هنا هى ان گل هذا الگلام من وحي خيال  الكاتب وان الكاتب لآ يملگ دليلآ واحد علي صدق حديثه ،،
"وان آدم هو اول انسان على وجه الارض"
والله تعالى اعلى واعلم .....
وسبب عرضي للموضوع هو التشويق والتفكير ومحاوله ربط العلم بالدين ،، وحت لو كان العلم خاطئ ف بعض الاحيان ف الدين لا ريب فيه ،، لا محال للخطأ ف كتاب الله ،، والله علي م اقول شهيد ...